Ao tapena le tatou au lakapi liki o le Toa Samoa ile taamilosaga muamua o le Siamupini o le pasefika, ua faailoa e le pelesetene o le lakapi liki a Samoa, ua maea ona faia se latou feutanaiga ma le pulega o le lakapi liki a Niusila ile faatauina o pepa o le taaloga a le Toa Samoa ma le au lakapi liki a Niusila ile taimi o lea taamilosaga ia Oketopa.

O le feiloaiga sa taloina ma tusitala na faailoa ai e le Pelesetene le susuga Fiu Faaolatane Ponifasio lea tulaga, aemaise foi o le sauni atu i lea taamilosaga ma manaoga faapisinisi e faaaoga ai meatotino a le Lakapi liki a  le atunuu e pei o le igoa o le Toa Samoa ma ata o tama taaalo e faatau i laei ma fu’a poo nisi lava ituaiga o oloa. Faaalia e le Pelesetene e taua tele le tausisia o aiaiga faaletulafono i le faia o lea tulaga.