Ua faamaonia mai e le Taitai o le atunuu le Tamaitai Palemia le faaiugafonoina ai e le Kapeneta i le aoauli nei o le faaauau pea ona iai o Samoa i lalo o le laasaga 2 mo le isi 2 vaiaso afua atu i le vaeluaga o le po nanei 19 o Aperila seia oo i le vaeluaga o le po o le Aso Lua 3 o Me 2022. 

O vaega ua toe fetuunai i lalo o le laasaga lua na faailoa e le afioga Fiame Naomi Mataafa e aofia ai; 

1. Tatala o pisinisi, faleoloa uma mai le 6 i le taeao seia oo i le 8 i le afiafi mai le Aso Gafua – Aso Toonai 

2. Mo le Aso Sa- Tatala auaunaga ua faatulagaina i lalo o aiaiga o le laasaga 2 mai le 12 i le aoauli e oo atu i le 8 i le afiafi 

3. Tatala le avanoa e fo’i ai tagata i o latou aiga pe a tapunia auaunaga i le 8 i le afiafi seia tā le 10 i le po ona tapu loa lea o le feoai o tagata ma taavale i luga o ala tetele mai le 10 i le po seia oo atu i le 6 i le taeao o le isi aso seia vagana ai taavale ma i latou e faatagaina  

4.  Tatalaina o le faatauina o le ava malosi i faletalimalo, faleaiga, falekalapu, pā pia ma faleoloa o iai laisene mo ava malosi i itula o loo tatala ai pisinisi ma faleoloa seia vagana ai ni aiaiga ua faataoto atu e le Liquor board mo le ava malosi 

5. Tatalaina o potopotoga i nofoaga faitele i le 50 tagata i totonu (indoors)e aofia ai ma faleie ae 100 tagata i fafo (outdoors) 

6. Tatalaina taaloga fai tupe ae gata i le 50 tagata ma ia tausisia le faia o talifofoga, faaalia o pepa tui i taimi uma, tūtū ma nonofo vāvā ma e tatala mai i le 6 i le taeao seia oo i le 8 i le po  

7. Tatalaina o taaloga ma faamalositino faasoifua Maloloina i aiaiga ua taua i luga i le aofai o tagata ma le tausia o puipuiga faasoifua maloloina 

8. Faatagaina o taelega i le sami ma vaitafe mai le 6 i le taeao i le 8 i le afiafi i aso uma o le vaiaso  

9. Faaauau ona tapunia aoga uma i le atunuu ae faaaoga tapenaga a faiaoga ma aoga taitasi e aoaoina fanau i auala faatekonolosi ma isi fuafuaga ua faatulagaina 

10. Faaauau ona tapu le feoai o tamaiti e i lalo ifo o le 12 tausaga le matutua i nofoaga faitele 

11. Faatagaina o faigamalaga i pasi ma taavale laiti i le aiaiga e tausisia le nofo valavala ma le faia o tali fofoga ma le faaalia o pepa tui i taimi uma 

12. Faaauau faigamalaga a vaa ae tausisia le nonofo, tūtū vāvā ma le faia o tali fofoga i taimi uma  

13. Faaauau pea ona faatulafonoina pisinisi mo i latou e gafa ma taaloga ma soo se faalapotopotoga e tausisia faatinoga o le tūtū vāvā mamao, o le faaaogaina o tali fofoga ma isi tulaga 

14. O le a toe foi galuega a le Mālō i taimi masani se tausisia pea puipuiga uma ma fuafuaga mo i latou ua aafia  

15. Tumau pea isi aiaiga e pei ona iai i le taimi nei e pei o aiaiga i malaga i vaalele, vaa la’uoloa, vaa i’a ma isi 

Na fautuaina ai e le Palemia le atunuu i le taua o le faia o tui puipui e saga puipuia mai ai i le pepesi o le faama’i ua iai nei.