O le Matagaluega o le Siosiomaga e tauala mai i le Ofisa o Vaaitau o loo faafoeina se fonotaga i vaega tau vaaitau i le atunuu.

E pei ona silafia e le atunuu o le ofisa o le Vaaitau o se tasi lenei o auaunaga o loo tele lo latou sao e ala i faamaumauga ma faamatalaga e tuuina mai i le atunuu i tulaga o iai le tau i aso taitasi ae le gata i lea o le faailo foi lea o ni mala faalenatura e ona afea ai le atunuu.

I faamatalaga mai le Matagaluega, o le fonotaga lenei o se avanoa aupito sili ona tāua e toe faamautu ai talatalanoaga a le Ofisa o Vaaitau ma nisi o itutino auā le galulue faatasi e ala i ana galuega faatino.  

O le fonotaga lenei o se auala lea i sui o le Ofisa e folasia ai vaega taitasi e unaia ai pea le faatinoga ma fuafuaga auā le agai i luma o le puleaina ma le faafoeina e tusa ma taiala o lenei ofisa.

O le a avea foi lea ma auala e faalauiloa ai le tulaga i fetufaaiga ma nisi o Matagaluega a le Malo ma paaga eseese i le tali atu ai i faalavelave faafuasei aemaise o suiga eseese ma le maaleale o le tau.

O loo faagasolo nei lenei fonotaga i le ofisa tutotonu a le Pasefika i Vailima.