Ua iai lipoti ua ta’ua ai o le a tapunia se tasi o ofisa faasalalau tele i Niu Sila le Newshub i le faaiuga o le masina o Iuni o le tausaga nei.

Fai mai le One News na tālo se fonotaga a le aufaigaluega i le taeao analeila lea e feta’ua’ina na faailoa ane ai lea faaiuga.

O le Warner Bros Discovery lea na te faatautaia le Three ma le Newshub na o latou tāloina le fonotaga.

Ta’ua i le lipoti talu mai Aokuso o le tausaga talu ai, ua aveesea pe faamuta le toe faia o puletini o talafou i le AM Early Show ma le puletini o le 11:30 i le taeao atoa ai ma talafou i le ta o le 8 i le po i le Eden Channel.

O le lua ai nei o ofisa faasalalau tetele i le atunuu ua faailoa le tapunia.

O le Today FM ma le auaunaga o ana talafou na faamuta foi ia Mati o le tausaga na tea nei.

E lē o faailoa maia i le lipoti le mafuaaga o lenei faaiuga a le kamupani.