O sui o le aunetipolo logologoa o le siamupini foi mai le aunetipolo o le Thunderbirds mai Adelaide i Ausetalia i Saute ua faagasolo se latou polokalame fesoasoani i lo tatou atunuu, mo le siitia o le tulaga o le taaloga netipolo mo tamaitai o le atunuu, i latou o loo fiafia i le taaloga.

E iva aso o loo faatino ai lea polokalame ma le faamoemoe ia maua ai le avanoa o faiaoga o le taaloga e faalautele ai lo latou silafia i le koleniina ma le a’oina o aunetipolo.

O se ‘ava o le feiloaiga na faafeiloai ai le aumalaga i le faaiuga o le vaiaso ma sa faia i le maota Samoa o le Pulega o Tagata Tafafao mai Fafo.

O tamaitai e lelei tele i le netipolo o le ‘au o le Thunderbirds o Lucy Austin ma Matilda Garett o loo taitaia ai le aumalaga e toavalu.

O le a taamilo i latou i nisi o aoga ma faalapotopotoga tau taaloga netipolo mo le faatinoina o le latou fesoasoani.