$10 miliona ua tuu ese e Niu Sila e faatupe ai le faasao o meatotō i le Pasefika faapea su’esu’ega o le tau.
O le faasilasilaga lea mai le palemia o Niu Sila Jacinda Ardern faapea le minisita o le va i fafo, Nanaia Mahuta a o iai i le fono a ta’ita’i o le Pasefika le Pacific Islands Forum i Fiti.
O le ‘afa o lea fesoasoani o le a faasoa i totonu o le lima tausaga mo le Centre for Pacific Crops and Trees o loo i Fiti lea e galue e faasao taamu, talo ma popo i le Pasefika.
Talitonu le palemia o se fesoasoani o le a saga faamautinoa ai le malupuipuia o meaai i le agai i luma i totonu o le Atu Pasefika, ma o loo aofia ai i lenei fesoasoani su’esu’ega faapitoa i aafiaga o le tau e ono aafia ai meatotō.
O le $10 miliona ua foaia e Niu Sila e sau mai lana $1.3 piliona o tupe faaagaga auā fesoasoani mo le tau.
