O le faai’uga o le masina o Aperila agai atu i le vaiaso muamua o le masina o Me o le tausaga nei o le a talimalo ai Samoa i le taamilosaga o le Ipu a le Lalolagi i le taaloga siisii u’amea mamafa.
O se tasi lea o taamilosaga ua tapena iai le faalapotopotoga o loo pulea lea taaloga i Samoa ma ua ave iai ma le lagolago a le malo o Samoa e ala i se fesoasoani tupe e tusa ma le 809 afe 500 tālā.
Ua faailoa e le ta’ita’i o le malo lea fesoasoani tau tupe i le mae’a faailoa lautele ai o se tasi o fesoasoani tau tupe mo lea lava taligamalo mo le Ipu a le Lalolagi i le taaloga siisii u’amea mamafa.
O le faletupe aoao o Samoa le National Bank of Samoa ua latou foa’iina foi le 50 afe tālā i le faalapotopotoga siisii u’amea mamafa.
O se faletupe o loo lagolago pea i soo se taumafaiga e auai se ‘ausiisii a lo tatou atunuu.
Ua faailoa i se lipoti e 78 atunuu ua faamautū i le taimi nei lo latou auai i lea taamilosaga o se taimi muamua o le a talimalo ai Samoa i se tausinioga o le Ipu o le Lalolagi i le taaloga siisii u’amea mamafa.
