O se polokalame fesoasoani a le Mālō o Ausetalia ua tuusa’o i le Matagaluega o Faatoaga ma Faigafaiva o loo iai ma le nofoaga o suesuega faasaienisi ua mau faailoga ai ni fai faatoaga koko i itumalo o Vaisigano No.1 ma Vaisigano No.2 faapea itumalo o Salega, Falealupo ma Alataua i Sisifo ina ua maea se tauvaga mo le atinae o faatoaga koko i Salafai.

O lenei tauvaga na vaaia ai le faapalaina ma le faamamago o fatu koko ua pula lelei ma maua ane ai i sailiiliga e 90-100% le lelei o le aano o fatu koko sa faapala ma faamamago e fai faatoaga o ia itumalo i le motu tele i Salafai. 

O le faamoemoe autu o lea fesoasoani a le Mālō o Ausetalia ia mafai e fai faatoaga koko o le atunuu ona ausia le tulaga maualuga o le lelei o le fatu koko e faatau atu i maketi i fafo mo le gaosiga o ituaiga taumafa eseese aemaise lava le sukalati. O loo fuafua e faia foi lea tauvaga mo fai faatoaga koko i Upolu.

O le tasi lenei o laau tau faatoaga ua toe ave iai le faamuamua i lona atinaeina ona o le lelei o le tau ua iai nei i maketi i fafo. O loo molimauina foi le alumia tele o le koko malū mai Samoa o loo faatau atu i le tagata o le atunuu o loo aumai i Niu Sila.

O nisi ia o polokalame o loo galulue ai le Matagaluega o Faatoaga ma Faigafaiva mo le unaiga lea o galuega tau faatoaga a faatoaga uma a le atunuu aua se tamaoaiga tele e fesoasoani ai i o latou aiga.