Ua faailoa e le ta’ita’ifono ma le ta’ita’i o le vaega faaupufai o le Faatuatua i le Atua Samoa ua Tasi le iai pea o le lagolago a Minisita e to’aiva o le Kapeneta i le tulaga ua iai nei suiga o ta’ita’i a le pati faaupufai, ae o le to’aono o Minisita e aofia ai ma le tamaitai Palemia ua mausalī le lē toe avea ma sui o le vaega faaupufai.

Na faailoa e le susuga Laauli Leuatea Polataivao Fosi Schmidt i le feiloa’iga ma tusitala i le faai’uga o le vaiaso, le taumafai e sa’ili se fofō i le tulaga ua aafia ai le lotoifale o le pati, ma ia faailoa ai se fono a le faafaletui sa tāloina mo le Aso Toonai na te’a nei, peitai ua faailoa e se molimau faatuatuaina e le’i auai Minisita o le Kapeneta o loo faitau pea i le li’o o sui faipule o loo avea ma sui auai o le vaega faaupufai o le faatuatua i le Atua Samoa ua Tasi.

Na faaalia e lea molimau o Minisita ia e to’aiva o nisi o i latou sa saini i le tusi na faamuta ai le toe avea ma sui auai o le pati o le Palemia ma Minisita e to’alima.

Na toe ave le latou tusi i le vaega faaupufai e logo iai e toe aveese a latou saini ona e le’i faitau i vaega uma o le tusi aemaise le vaega sa faailoa ai le lē toe iai o se faatuatuaga o faipule uma o le pati i le ta’ita’iga a le sui faipule tamaitai o le itumalo faapalota o Lotofaga.

O le sa’iliga fofō o loo taumafai iai le ta’ita’i ua iai nei ma isi tofiga ua suia o le vaega faaupufai o le a maua ai se tali.

Le susuga Laauli Leuatea Polataivao Fosi Schmidt o le ta’ita’ifono ma le ta’ita’i o le vaega faaupufai o le Faatuatua i le Atua Samoa ua Tasi.