Ua aafia nisi o faatoaga i totonu o Niu Sila e mafua i lologa mai timuga mamafa o le afā o Kapelielu, ma ua aafia ai ma le tulaga maua pea o galuega faavaitaimi a nisi mai Samoa ma isi motu o le Pasefika.
O le fesili tele lea, pe iai nisi galuega e mafai ona faaauau iai, pe o le a toe faafoi mai loa i Samoa o tatou tagata ua aafia faatoaga sa galulue ai.
Faaalia foi e le afioga i le Palemia i le feiloaiga ma tusitala i lenei vaiaso, o tagata faigaluega faavaitaimi ua feagai ma mafatiaga ona o lologa i vaega o Niu Sila o loo galulue ai, e leai se isi o afaina soifua mai ia mala faalenatura.
O le tuualalo lea a le Malo i mātua ma aiga o i latou ua afaina nofoaga sa faamautu ai i faatoaga o loo galulue ai, o loo faia feutanaiga ma le Malo o Niu Sila aemaise o pulega o faatoaga ua mae’a sainia ai a latou konekarate mo avanoa o galuega faavaitaimi.
Ua faailoa e le tamaitai Palemia i le feiloaiga ma tusitala ina ua fesiligia, e le o mautinoa le aofaiga o tagata faigaluega faavaitaimi mai Samoa ua aafia a latou galuega ona o lologa mai le afā o Kapelielu sa taia ai le atunuu o Niu Sila i le amataga o le vaiaso nei.
