A o tālia ai i le asō le uluai peimeni o le fesoasoani a le malo mo le tau o le soifuaga, e iai tagata ua aumau i atunuu i fafo ua maua imeli o le a latou mauaina foi lea faamanuiaga. 

O lea ua maua e tagata agavaa mo lea fesoasoani imeli mai le Inland Revenue o le a totogiina mai le cost of living payment i totonu o a latou tusitupe. O le peimeni lenei e na o i latou e maua le $70,000 i le tausaga pe i lalo ifo foi, 18 tausaga pe sili atu, ma e lē o agavaa i le winter energy payment. 

O le isi itu e tatau ona faamalieina e tatau ona e nofo i totonu o Niu Sila. Peitai ua iai lipoti o nisi ua silia ma le lua tausaga o nonofo i atunuu i fafo, lea na o latou mauaina foi le imeli lava lea e tasi. 

Ua sau ai ma le fesili, pe faamata e to’afia tagata e lē o nofomau i Niu Sila o le a maua lenei peimeni, ae o le ā foi se fofo. Ae mai le sooupu a le Inland Revenue, o loo fua lava le totogiina mai o le peimeni i faamaumauga o loo i le Inland Revenue, ma e lē o tagata uma foi ua tuua le atunuu mo atunuu i fafo o faailoa atu i le matagaluega a mea ua aumau i isi atunuu seia vaganā ai i latou o totogi student loans. 

 Afai ae e mauaina lenei peimeni ae e te lē agavaa ma e aunoa foi ma ni faiga taufaasese, a’o le sasi o le Inland Revenue, ta’ua e le sooupu i lipoti a le TV1, e lē toe tuliloaina mai oe e toe totogi atu.