Ua iai le popolega i le lē tele o ni avanoa e mautinoa ai le lumanai o tagata o loo umia visa faigaluega a o le’i toe mamao tapunia le faaulu o talosaga mo visa nofomau faapitoa na o le faatasi ona ofo mai e le malo.
O visa nei e faatalosaga ai mo avanoa nofomau na faia mo tagata faigaluega e le’i nofomau i le tausaga talu ai, ma e oo mai i le taimi e tuufaatasia ai tala e silia ma le 200,000 i latou ua talosaga ae na o le 60,000 ua talia.
Mai se tasi na talosaga ma ua talia, o se fiafiaga tele mo ia lenei avanoa ona ua iai se avanoa ua mautinoa ai lona lumanai i Niu Sila.
Ae mo i latou e le’i manuia pe o loo faatali pea e lē o faigofie ma o loo tuufesili pea, ma o le faigata ona e lē tele ni avanoa agavaa e mafai ai ona faatalosaga mo nofomau.
I faamaumauga a le Immigration a Niu Sila o le to’atele na talosaga i le tausaga talu ai o tagata mai Initia, Filipaina, Saina ma Aferika i Saute.
O le to’atele foi o i latou e lē o agavaa i visa o le a faamuta le avanoa e talosaga ai i le faai’uga o Iulai e lē o mafai ona agavaa ona e lē o faamalieina le totogi e $27 i le itula poo le faamalieina foi o le tatau ona tolu tausaga talu ona i totonu o Niu Sila e oo mai i le faai’uga o Setema o le tausaga talu ai.
Ae mai le minisita ia Michael Woods, ua faia e le malo le visa fou ua ta’ua o le Accredited Employer Work Visa ma e amata tatala mo talosaga nofomau mai le masina o Setema.
