Ua tālia nei e afio’aga o le itumalo o Safata le faatalanoaga mulimuli ma le komiti faapitoa a le malo o loo gafa ma feuiuia’iga o le totogiina atu o le 10 miliona tālā o le taui tupe ona o aafiaga mai le manuao o le Manawanui o loo goto i gataifale o lea itumalo.
O lea feiloa’iga o le a faamautū ai loa le faatinoga o le tufaina o le taui tupe lea ua faailoa e le Palemia o le a tufa i tagata ta’ito’atasi ma pisinisi na aafia, ae o se tufatufaga foi o le a aofia ai ma Siumu.
O lea ua faailoa e le ta’ita’i o le malo le afioga i le palemia susuga Laaulialemalietoa Leuatea Polataivao Fosi, o le a tauave e le malo le galuega o le tufatufaina o le 10 miliona ma o loo fuafua a lē o le faai’uga o lenei tausaga o le amataga o le Tausaga Fou e faataunuu ai loa lea tulaga.
Ua 14 nei masina talu ona tuana’i le faalavelave ia Oketopa o le tausaga ua mavae na aafia ai lea manuao i se faaletonu ma i’u ina goto ai i gataifale o Tafitoala o se tasi o afio’aga o le itumalo o Safata.
Ua faailoa e le ta’ita’i o le malo i le fono ma tusitala o le a fua le tupe e maua o le taui i aafiaga o tagata ma pisinisi mai suāuu masaa ma isi aafiaga o le soifuaga o aso uma ona o le goto o lea manuao o le fitafita o le sami a le malo o Niu Sila i ogasami o lea vaega o le motu o Upolu.
