Ua amata aloaia le malaga faalemalo a le afioga i le Palemia o Samoa, Fiame Naomi Mata’afa i totonu o Niu Sila. 

O le aso ananafi na faafeiloa’ia ai e le Palemia o Niu Sila, Jacinda Ardern a o malaga mai ai i lana uluai malaga faalemalo talu ona avea ma Palemia. 

Ese mai i le tele o mataupu na talanoaina i le va o ta’ita’i e lua, na faaalia e le afioga i le Sa’o Faapito i le mae’a ai o le fonotaga e leai ni talanoaga a Samoa ma Saina e faatatau i militeli. 

O se mataupu lenei o loo laualuga i le Pasefika talu ona sainia maliega i le va o Solomona ma Saina ia Aperila lea ua matala ai le faitoto’a e mafai ai ona agai atu le militeli a Saina ma o le popolega o lea maliega o le ono faaaogā ai e Saina o Solomona e faamautu ai lana militeli. 

Ua faailoa foi e Fiame lona taofi e lē gata i le Palemia o Niu Sila a o isi ta’ita’i, e faapea o se mataupu e moomia ai le omai faatasi o le itulagi o loo tatou aumau ai ma iloilo poo mafai, a leai ona vailiili lea o itu tau saogalemu i totonu o le Pasefika. 

Ae mai ia Jacinda, o loo malosi lona taofi e mafai e le Pasefika ona tutū faatasi. 

A o malaga mai ai Fiame ma auai i le faamanatuina o le 60 tausaga talu ona tuto’atasi Samoa i Aotearoa nei, ua manatua ai foi ma le 60 tausaga talu ona sainia le maliega ua ta’ua o le Treaty of Friendship a Niu Sila ma Samoa.