O loo talia lelei e le Itu Agai a le Feterale le malaga asiasi mai a le Minisita o le Va i Fafo a Saina i Ausetalia.
Ae na faapea mai le Itu Agai e ao ona faaauau pea ona mataitu le faamoemoe o se tasi lea o tagata maualuga i upufai a Beijing.
Na feiloai atu Wang Yi ma le Minisita o le Va i Fafo a Ausetalia, Penny Wong i Canberra ma ua fuafua foi e feiloai ma lē sa avea muamua ma Palemia o Ausetalia, o Paul Keating.
Fai mai le Itu Agai e lelei le faimalaga mai o le Minisita ae e ao lava ona faaeteete Ausetalia.
Na saunoa le Minisita o le Shadow Finance, Jane Hume, e tatau ona faaeteete Ausetalia ona e foliga e uigā foi le feiloai atu o Wang Yi i lē sa avea muamua ma Palemia o le atunuu, o lē sa faaalia lona lē fiafia i faiga faavae a le faigamalo o iai nei.
Ta’ua e Hume ua ta’u mai ai lava i le faamoemoe o le Minisita mai Saina ina ia faamavaevae ma pulea mea, poo le faaperetania divide and conquer.
