Ua see atu Samoa i le tofiga taitaifono o le soofaatasi a malo laiti le Alliance of Small Islands States e pei ona taimua ai tina ma tamaitai faapea tupulaga talavou i le taua faasaga i suiga tetele ole tau.
O le taitai o le Malo le afioga i le tamaitai Palemia Fiame Naomi Mataafa ua seei i le taitaifono o lea soofaatasi o malo laiti a o auai i le fono a taitai o Malo Aufaatasi o loo usuia i lenei vaiaso i le aai o Niu Ioka i Amerika.
O le feiloaiga a le faauluuluga o Malo Aufaatasi le Failautusi ia Antonio Guterres ma le afioga i le Palemia o Samoa i le amataga o lenei vaiaso na faailoa ai e le failautusi le tāua tele o le auai o tina ma tamaitai faapea tupulaga talavou i tonu fai ma pulega ina ia mafai ona ausia manulauti o le atinae o atunuu taitasi.
Ua ave ai foi le faafetai a Antonio Guterres i le taitai o le tatou Malo ona o galuega faaauau mo le unaia pea o nisi o fuafuaga a Malo Aufaatasi.
