O le aoauli ananafi sa fai’aiga ai tamaitai o le Tauvaga Tausala o Samoa ma le Tamaitai Palemia o Samoa, Afioga Fiame Naomi Mataafa i le faletalimalo o Le Lava i Sogi.
O se faaaloalo maualuga a Tamaitai Tauva peitai ua maua ai ma le avanoa faaauro e faalogologo ai i le faasoa a le Taitai o le atunuu, i lona soifuaga o se Matai, o se faipule na amata mai mai lava i lona talavou seia oo ina avea nei ma Palemia o le atunuu.
O lea faasoa sa tuuina atu ai foi le faamalosiau, le lototele ua feauga lelei ma le tapenaga o le vaega faaiu o le tauvaga i le Aso Toonai.
Na mae’a ona sosoo lea ma le faatalatalanoaga o tamaitai tauva i mataupu e le gata i le lotoifale o le atunuu, nafa ma le tāua o tamaitai ma o latou malosiaga, ae faapea foi aafiaga o onapo nei i polokiki, o suiga o le tau, mataupu tau le Pasefika la tatou tu ma le aga ma le sao tāua o tamaitai i le atina’e o Samoa.
