O le taeao nei na feiloai ai le faauluuluga o Iunivesite tetele e lua i le atunuu le Tapaau poo le Peresetene o le Iunivesite Aoao o Samoa (NUS) Professor Aiono Alec Ekeroma ma le Peresetene o le Iunivesite o le Pasefika le USP Professor Pal Ahluwalia.
O lenei feiloaiga e iai talitonuga o faauluuluga o Aoga e lua e tatau ona galulue faatasi e faaleo le tele o vaega moomia i le itu tau aoaoga i totonu o Samoa faapea le Pasefika.
Ta’ua e Professor Aiono o mataupu tau Faatoaga o se vaega taua tele lea i le atinae ga o Samoa ma o loo iai se mataupu faapea i le vaega o tipiloma ua faaigoaina Sustainable Agriculture faapea tusi pasi i le Horticulture a le NUS, o se tasi o vaega ma galulue vaavaalua ai ma le USP.
E le gata i lea ua iloga foi le USP i a latou polokalame tau Faatoaga ma le siosiomaga ma e toatele foi alo ma fanau na o latou tauaveina ia mataupu.
O se tasi lea o vaega o le a faaauau ai ona galulue soosootauau Pulega o Iunivesite e lua e unai manatupu ia tau Faatoaga mo le lumanai manuia o Samoa. Ma o le a iai vaega poo kulupu e galulue mo isi atinae mai Iunivesite e lua mo nisi fuafuaga o i luma.
