E lei leva nei ona tauaao tusi tofiga o le tamaitai Komesina maualuga o le Malo o Niu Sila le afioga Si’alei Allegra Van Toor, i le afioga i le Ao o le Malo e aloaia ai lona valaauina e galue i Samoa o se sui o lona malo, ae o lea ua faagasolo se tasi o ona tiute tāua o le feiloai i taitai o itutino fefaatauagai o le Malo.
O le Aso Lulu o le vaiaso nei 28 o Fepuari na feiloai atu ai i le afioga i le Fofoga Fetalai o le Palemene, Susuga Papalii Li’o Oloipola Ta’eu Masipa’u.
I le pepa faalauiloa mai le ofisa o le Fofoga Fetalai ua faailoa ai o se asiasiga faaaloalo a le Komesina Maualuga e feiloai ai i le Fofoga Fetalai ma faasoa ai i auala e faamalosia atili ai faiga faapaaga a Malo e lua, ma faailoa ai foi ni vaega o loo vave manaomia ai se fesoasoani mo tulaga tau atina’e.
“Sa uluai tautua le Afioga Si’alei o le Amepasa o le Malo o Niu Sila i Rusia mai le tausaga 2020 i le 2022, e faapea foi i totonu o Armenia, Kyrgyzstan, Kazakhstan, Turkmenistan, Tajikistan ma Uzbekistan.
Sa ia tauaveina foi le tofiga Faatonu o le Ofisa o Pisinisi ma Alamanuia a Niu Sila i totonu o Taipei mai le 2014 i le 2017”.
Sa avea foi o ia ma Faufautua Sinia i Mataupu Tau Fefaatauaiga i le Minisita o Fefaatauaiga ma Tamaoaiga i le 2017.
Sa faaiuina i le tausaga 2023 lona tauaveina o le tofiga Faufautua Sinia i Mataupu Tau le Va i Fafo i le Minisita mo Mataupu Tau le Va i Fafo.
Sa faaleoina faamanuiaga a le Afioga i le Fofoga Fetalai i le Afioga i le Komesina Maualuga.
