Fai mai lipoti a le ABC ua fesagai se sui o le ofisa o Saina ma se amepasa o mataupu tau le puipuiga mai osofaiga i luga o le initaneti, cyber security a Ausetalia i le mae’a ona ia faia o ni faamatalaga e faapea o Beijing lea e faatinoina nisi osofaiga i luga o upega tafailagi ua faia mai ia Ausetalia. 

Molimau nisi sa iai i lea fesagaiga na faailoa le lē fiafia o le sui mai le ofisa o Saina i le mataupu lea ma e ui sa toe tali atu iai le sui mai le ofisa o Ausetalia e faapupula atili le uiga o ana faamatalaga ae ta’ua i le lipoti le faailoga o finagalo o nisi o sui auai i lea faatasiga latou te faasaoina le lē fiafia o Saina i le mataupu lea.

Saunoa se sui o le ofisa o le va i fafo a Ausetalia i le ABC o loo faaauau pea ona taumafai e galulue ma ana paaga uma faavaomalo e lagolago ma faatumauina le saogalemu o le faaaogāina o le initanneti ma ia mautinoa o loo saogalemu ma tausia tulafono faavaomalo tau le puipuiga i luga o upega tafailagi.