Fautuaina le toe silasila i tulafono e taofia ai ata mataga mai luga o telefoni feaveai

Ua ave le fautuaga malosi a le faamasinoga i le Ofisa o le Komisi o le toefuataina o le tulafono e silasila poo iai se tulafono e faatonutonu ai tautua a Kamupani tau fesootaiga e patino lea i telefoni feavea’i ina ia mafai ona taofi le avatu o ia auaunaga o faasalalauga o ata mataga.

O lea fautuaga na mafua mai i se faamasinoga a se alii talavou ua nofosala nei i le Falepuipui i lona faaaoga o nisi o ituaiga o faasalalauga e faamatamata ai se teineititi 12 tausaga le matua o lona lava tuafafine ma taunuu ai ina molia e leoleo i le mataifale.

Na maitaga le na aafia i le solitulafono na faia e lē ua faasalaina.

Na faatonu ai e le Faamasino le afioga ia Tafaoimalo Leilani Tuala Warren le tuuina atu o kopi o lana faaiuga i le Minisita o Fesootaiga ma Faamatalaga Tekonolosi faapea le Pule Faatonu ma Pulega o Kamupani Telefoni feaveai le Vodafone ma le Digicel aemaise o le Ofisa o le Komisi mo le toe fuataina o le tulafono. 

O le naunautaiga o le faamasinoga ia silasila i latou uma nei i le ogaoga tele o le solitulafono na tupu o le faaaogaina ai o auala o fesootaiga faaonaponei o loo faaaoga ai telefoni feaveai ma ia fai iai se galuega e saili ai se fofō ina ia puipuia malu ai fanau iti.

Share on facebook
Share on twitter
Share on email
Share on whatsapp
Scroll to Top

Keep uptodate with Radio Samoa activity & promotion

* indicates required