Ua faataalise mai se faasalalauga faalaua’itele mai le pulega o le kamupani vaalele o le Samoa Airways ua lapata’ia ai le atunuu ina ia aua ne’i faaaogāina ma talitonu i se faasalalauga taufaasesē ua faaaogā ai le igoa o le kamupani vaalele ma le malo.
O luga o le api o foliga le facebook o loo alu ai lea faasalalauga o loo faailoa ai le maua o se manumālō tupe e sefulu afe pe a sa’o le taliina o fesili.
O le fautuaga a le Samoa Airways aua ne’i tatalaina lea faasalalauga ina ia taofia ai le salalau atu i isi o lea fe’au taufaasesē e lē moni.
E ese mai lea lapata’iga mai le kamupani vaalele a le atunuu, o lea ua faailoa e le Palemia i le fono ma tusitala i le Aso Lulu, ua filifilia nei se komiti latou te tapena ma faatulaga le auaunaga a le Samoa Airways e pei ona o le a toe faia ai malaga a vaalele tetele mai Samoa aga’i atu i Niu Sila, Amerika ma Ausetalia.
Ua faailoa ai foi e le ta’ita’i o le malo ma le aga’i atu o lea komiti a le malo e filifili sui o le Komiti Faafoe mo le pulega o le kamupani vaalele a Samoa.
