O le Ofisa Sili lagolago o le Matagaluega o Pisinisi Alamanuia ma Leipa o loo faauluulu iai avanoa mo galuega faavaitaimi afioga ia Lemalu Nele Leilua na ia taua i se faatalatalanoaga ma le sui o le Radio Samoa e na’o le latou Ofisa lava e fai ai resitala mo avanoa ia.

Ua ala ona fesiligia le Ofisa ona o ni faiga taufaavalea ua aafia ai nisi o atunuu i ni tagata ua faafoliga e galulue e saili avanoa faigaluega ma totogi tupe mo resitala.

Taua e Lemalu “O nei gaioiga e masalomia foi le iai o sesi tagata matua i totonu o le li’o lea ae o le mea e aupito sili ona faanoanoa ai ua leva ona tapena nai tamaiti, faimai tamaiti na oatu analeila (ananafi) i le Ofisa ua leva ona o latou tapena iai ae e ao tupe e le gata i lea na totogi a latou ta’i $300 ma tuu o latou passport”.

Na fesiligia loa e le Ofisa i latou na aafia pe aisea e lei oo atu ai se isi i le Ofisa e fesili pe moni ea nei mea e tutupu mai tua peitai e leai se isi na oo atu i le ofisa.

Taua foi e Lemalu “O le mataupu lenei e lē faigofie ua fefefe tamaiti e toe foi i o latou aiga ona ua tele tupe ua faaalu, o lea la ua tuu atu le

mataupu i le Ofisa o leoleo e fai ai le latou suesuega poo ai tonu lava le faapogai lea e mafua ai gaioiga faalealofa faapea”.

O le tulaga foi e maofa ai le Ofisa i le atunuu o loo o latou silafia e iai le Ofisa o Pisinisi Alamanuia ma Leipa peitai o lea e o solo i tua i isi tagata ma tupu mai ai nei faafitauli.

O le fautuaga a le Ofisa Sili Lagolago a manaomia le fia maua o ni avanoa mo galuega faavaitaimi faafesootai le Ofisa tutotonu ae aua lava nei agai solo i nisi tagata i tua.

E pei ona silafia e lata i le to’a 20 i latou lea na aafia i nei faiga taufaavalea ma ua ave foi se faasalalauga faalauaitele e fautuaina ai ina ia aua nei seetia i ni talaiga ua folafola atu ai se resitala i ni avanoa mo galuega  faavaitaimi.