Ua fautuaina nei i latou o foma’i i matāupu tau fesoasoani muamua poo paramedics faato’ā faauu mai i totonu o le atunuu o Wales ina ia amata sa’ili galuega mai i totonu o Niu Sila nei.
I ripoti mai le BBC, na faamauina ai le lē toe iai o ni avanoa faigaluega mo i latou o foma’i o taavale fesoasoani muamua i lenei tausaga, ona o tulaga faaletonu ua iai nei le tamaoaiga, ae peita’i ua o latou fautuaina fanau a’oga o lea matātā e amata sa’ili avanoa i Kanata, Ausetalia faapea Niu Sila.
O lea galuega (ambulance paramedic) o se tasi lea o galuega o loo i lalo o le vaega ua ta’ua o le Green List Tier 1 a le Vaega o femalagaa’iga a Niu Sila, o galuega o loo moomia ai ni tagata i totonu o le atunuu.
Ae peita’i o lea ua faamanino mai e le sooupu a le ofisa o le Minisita o Femalagaa’iga, o loo aga’i tonu le sa’iliga i ē ua au tausagā ona galulue i lea matātā nai lo o i latou faato’ā uma mai a’oa’oga.
Faamanino e le asosi o taavale falema’i mo fesoasoani muamua (Ambulance Association) o nei avanoa e ono aga’i lea mo nuu i tua, e aofia ai Ohakune, Taumarunui, o itu i Sasa’e o Northland i le North Island faapea itu i Sisifo o le South Island.
Faailoa e le asosi e lē o le taimi muamua lea ua tula’i mai ai lea matāupu ma sa’ili galuega mai ai isi tagatānuu i Niu Sila nei.
Puna o Faamatalaga: https://www.rnz.co.nz/news/national/591631/welsh-paramedic-graduates-told-to-look-for-entry-level-jobs-in-new-zealand-instead
