Ua maua i se suesuega sa faia i Ausetalia e tele atu avanoa e lavevea ai taavale e umia e talavou poo avetaavale talavou pe a faatusa ai i le faaaogā tasi pea o le taavale a le aiga atoa.

Fai mai le 9News o faamaumauga ua iloa ai e silia a le 20 afe talavou Niu Sa Uelese sa faia iai le suesuega e le au suesue mai le Iunivesite o NSW, The George Institute ma le University of Western Australia.

Ua iloa i le suesuega o avetaavale talavou, e 30 pasene e maualuga ai le lamatiaga e feagai ma latou e ono lavea ai le taavale aemaise lava i le uluai tausaga faatoa avetaavale, pe afai e ave lava e latou a latou taavale pe a faatusa atu i avetaavale talavou e latou te faaaogā pe borrow foi taavale a o latou aiga. 

Ua ta’ua i le lipoti i atunuu e tetele tupe maua e pei o Ausetalia, e foliga e iai se talitonuga faapea a maua loa lau taavale ua e saofia i luga o le alatele ua e saoloto ma tutoatasi ai.

Peitai la o le taimi lenei, i le itiiti o le malamalama ma le silafia i luga o le auala, o se taimi aupito ogaoga lea mo nei avetaavale talavou.

Ma e foliga foi e iai se manatu o le umia o a latou lava taavale, o lona uiga o le a sui ai foi ma le aveina o le taavale ma o le tele foi o le avanoa ua ia maua e ono suia ai lona manatu i le ituaiga faafoega o le taavale e manao ai, nai lo le taimi sa faaaogā ai pea le taavale a mātua poo le aiga foi.

O le fautuaga la mo mātua mai lea suesuega, aua le vave faatauina se taavale a lou alo talavou.