O le Aso Tofi o lenei vaiaso ua toe faaauau taualumaga a le fono aoao faitulafono i le mae’a o le aso malolo o le tuto’atasi, ma ua faaauau ai saunoaga faalauaitele a sui usufono, i le lipoti a le komiti su’esu’e faapitoa na silasila i ni fesuia’iga o ni vaega o le tulafono teuteu o le faavae ma le tulafono fou o faamasinoga o fanua ma suafa.

O loo fautuaina e le komiti le faaui i tua ma lafoai ia tulafono e lua, ae fautuaina le ave i le matagaluega o leoleo ma le Loia Sili a le Malo e silasila pe faia ni moliaga solitulafono faasaga ia i latou na toe faia ni suiga i ia tulafono, e ese mai i aiaiga na pasia e le Palemene ia Tesema o le tausaga e 2020.

Ua fautuaina e le sui ta’ita’i o le Itu agai le ta’ita’ifono ma le komiti afai ae toe faaui i tua ia tulafono e ao ona tuuina atu se tulafono taufaaofi e faatino ai lea fautuaga, poo le mana’omia o le 2 vae 3 o nofoa e 54 ua iai nei e mafai ai ona lafoai ma faasolomuli i tua.