Ua masua mai i fafo e ala i se tusi se fautuaga a le tamaitai Pule Faatonu poo le Regulator le afioga Lematua Gisa Purcell, ua ave i le Minisita o le Matagaluega o Fesootaiga ma Faamatalaga Faatekonolosi, ua fautuaina ai le faia o se iloiloga i le taitaifono ma sui o le Komiti Faafoe o le Pulega o le faalapotopotoga o le malosiaga tau eletise le EPC, ma ia faia iai ni suiga.

Ua lipotia lea finagalo i le tusi a le Pule Faatonu i le lomiga o le nusipepa o le Sunday Samoan e mafua ona o se maliega na fausia i le va o lea faalapotopotoga a le Malo ma se kamupani i Farani e gaosia le eletise mai le malosi o le la poo le solar e ta’ua o le E.D.F Granite.

O lea maliega e faasino i le faatauina atu o le eletise e lea kamupani i le faalapotopotoga o le malosi faaeletise a le atunuu. 

Ua faailoa e Lematua Gisa Purcell i lana tusi ua lipotia e le nusipepa, o lea maliega e solitulafono ma ua le mulimulitaia ai aiaiga o le Tulafono o le malosiaga faaeletise o le tausaga e 2020.

O le manaoga o le kamupani mai Farani na momoli i le taitaifono o le EPC i se tusi, e fia faatu sana auaunaga i Samoa e maua ai le eletise mai le la, peitai ua faailoa e le Pule Faatonu i lana tusi ua tauaao e le Minisita o Fesootaiga ma Faamatalaga Faatekonolosi o loo iai ma le vaaiga o le ofisa o le Pule faatonu, e le mafai i lalo o se tasi o aiaiga o le Tulafono o le malosi tau eletise ona faia se feagaiga a le faalapotopotoga ma taunuu i se maliega mo le faatauina mai o le eletise ma se kamupani tumaoti e aunoa ma le iai o se ioega a le Pule Faatonu.

Ua faailoa lea lape i fesootaiga a le taitaifono o le Komiti Faafoe o le EPC ma lea kamupani e gaosia le eletise mai malosiaga faafouina, ma le faailoa e le Minisita o le faalapotopotoga o le malosi tau eletise le tofa Olo Afoa Fiti Vaai, i se pepa o faamatalaga le faia o se suesuega i se isi feagaiga na faia e le faalapotopotoga o pulea le auaunaga tau eletise i le atunuu, ma se isi kamupani i fafo o loo sailia ai se tagata poo ni tagata o loo ogatotonu i ni fesootaiga e maua ai seleni i fefaatauaiga kasa kaponi poo le Carbon trade.