Ua taulimaina nei se kopi o le Lipoti a le Komiti a le Palemene sa suesueina le mataupu na lāgā e le Loia Sili a le Malo e uiga i le teuteuga o le Faavae 2020 ma le Tulafono fou o Fanua ma Suafa 2020, ma ua fautuaina ai e le komiti le toe faasolomuli i tua pe dispose ia tulafono e lua, ona o aafiaga e mafua i ni suiga ua faatino faasolitulafono e se tagata poo ni tagata, ae ua talitonu le komiti e lē o le atoaga lea o ia tulafono sa pasia e le Palemene, ua mafua ai ona maua ni lomiga se fā o ia tulafono e lua e eseese uma.

O le Peresetene o Faamasinoga o Fanua ma Suafa, o lē sa avea ma Failautusi o le Fono Aoao Faitulafono ma nisi o le aufaigaluega sa aafia i le faia o ni suiga o ia tulafono ma ua lē tausisia ai vaega o ia tulafono na pasia e le Fono Aoao Faitulafono ia Tesema o le tausaga e 2020. Ua fautuaina ai e le Komiti suesue faapitoa le molia oi latou na faia ia suiga e aunoa ma le uia o tulafono tumau 113. 

 O lea fautuaga a le komiti e faitauina faapenei.  
“Ua mautinoa ma talitonuina e le Komiti su’esu’e lenei, le solia ei latou na faia nei suiga i lo latou lava suia o Tulafono a le Palemene mamalu o Samoa, e aunoa ma le uia o Tulafono Tumau 113, ma ua atagia ai le matuā solia o le Vaega 9(5) o Tulafono o le Fetuuna’iga ma Lomiga Faasalalau o Tulafono o le tausaga 2008 faatasi ai ma le Tulafono Tumau 186 (d) (e).

O lea, e fautuaina ai le Palemene ina ia faase’e atu lenei mataupu i le Ofisa o le Loia Sili ma le Matagaluega o Leoleo mo ni moliaga talafeagai faasolitulafono mo i latou uma o aafia i lenei mataupu”. 
O le taunuuga foi o le suesuega a le Komiti Faapitoa ua fautuaina ai se faiga fou mo le faamalosia ai o le siakiina mae’ae’a lelei o Tulafono poo se vetting process i le mae’a ai ona pasia e le Palemene.

O lea faiga fou o le a auai ai le ofisa o le Loia Sili e galulue soosoo tau’au ma le Ofisa o le Failautusi o le Fono Aoao i le faatinoga o lea siaki mulimuli a o lei tuuina atu mo le faamaoniga a le Ao o le Malo.

O le tauaofiaga a le Palemene talu ai nei na faataatia ai e le taitaifono o le komiti le afioga i le sui Fofoga Fetalai le lipoti peitai e lē o iloa se taimi o le a saausi ai saunoaga a sui usufono i le lipoti ma faamautu ai se faai’uga mulimuli.

O sui o le komiti suesue faapitoa a le Palemene sa feagai ma le saunia o le lipoti ina ua mae’a a latou sailiiliga, o le taitaifono o le afioga i le Sui Fofoga Fetalai le tofa Auapa’au Mulipola Aloitafua Mulipola, afioga Loau Solamalemalo Keneti Sio, o le sui taitaifono, ma sui o le komiti o le tofa Tuu’u Anasii Leota, afioga Ala’iasa Moefaauouo Malagaitutogiai Sepulona Moananu, Faleomavaega Titimaea Tafua, Laumatiaamanu Mathew Ringo Purcell, ma le tofa Seuamuli Fasi Toma.