E lua ni kamupani i Samoa o loo faafoe e nisi o tamafanau a lo tatou atunuu, ua manumalo i le tauofoga o le tasi e fausia le maota fou o le Faletupe Tutotonu o Samoa i le tau e silia i le 31 miliona tala, ae o le isi kamupani o le a vaaia le fausia o lea galuega tele.
O le Apex Solutions o le a fausia le fale atoa ae o le kamupani konesale o le Sucon Consultant na tusia le ata ma o le a vaaia le faatinoga o le fausia o lea maota o fausaga faaonapo nei.
E 6 eka le tele o le eleele o se meatotino a le Faletupe Tutotonu o Samoa o loo i Ululoloa o le a fausia ai lea galuega mo le umi e 20 masina.
O se maota o le a faagaioia ai nisi o galuega a le faletupe ma teu malu ai tupe, peitai a iai se taimi e aafia ai le nofoaga o le faletupe o loo i le eleele fou e mafua i suiga o le tau, ona see lea o ana galuega i le nofoaga o le a fausia.
O le eleele e ono eka na faatau mai e le Faletupe Tutotonu o Samoa mai le kamupani vaalele o le Polenisia i le tausaga e 2013.
O se nofoaga sa faamautu ai le aufaigaluega a le kamupani vaalele e pei o pailate, peitai na faatau e le faletupe tutotonu i le tau e $3.2 miliona tala Samoa.
Le afioga Lautimuia Afoa Uelese Vaai o le Minisita o Tupe o loo iai ma le vaaiga o le Faletupe Tutotonu o Samoa.
O le Aso Faraile na tea nei na aloaia ai le amatalia o lea galuega tele i le sauniga o le suaina o le eleele, ma o le taitai o le Malo le afioga i le Tamaitai Palemia na saunoa i le saunoaga autu.
Le tamaitai Palemia afioga Fiame Dr Naomi Mataafa i se vaega o lana saunoaga i le sauniga o le suaina o le eleele o le a fausia ai le maota fou o le Faletupe Tutotonu o Samoa i Ululoloa.
