O sailiiliga sa feagai ma le laumua o mataupu tau Samoa i le Iunivesite Aoao o Samoa i le toe sailia o talafaasolopito o le falepuipui i Vaimea na fausia i taimi o pulega a Siamani ma faaauau ona faaaogā i taimi o pulega a Niu Sila, ua faailoa i sailiiliga na faia, e na o le toaono lava tagata na maliliu ai i le falepuipui ona o le faatinoina o le faasalaga o le oti e ala i le sisi o le ua se’i tulou.
O se tasi o faiaoga sinia o le laumua sa auai i le sailiiliga le faletua o Dionne Fonoti, na ia faailoa i le sauniga na tuuina atu ai le lipoti o lea sailiiliga, e toafā ni alii Saina na faatino iai lea faasalaga ona o le solitulafono o le faaoo o le maliu i se isi tagata, ae o le isi toalua o tagata Samoa.
O le tāua o lea sailiiliga ua aveesea ai lagona taatele o tagata o le atunuu o loo manatu e faitau selau ola ma soifua na fano i lea falepuipui ona o le faasalaga oti.
Le susuga Dionne Fonoti i se vaega o lana folasaga i le gagana Peretania e faatatau i le latou sailiiliga i le talafaasolopito o le falepuipui i Vaimea i taimi o pulega faakolone a Siamani sosoo ai ma Niu Sila.
O lea foi sailiiliga na iloa ai sa iai se isi falepuipui na fausia e Siamani i le nofoaga e ta’ua o Tuvao i Mulifanua.
Ae o le falepuipui i Vaimea sa tele ina ave iai tagata solitulafono e lē gata o tagata Samoa, ae o tagata o isi atunuu sa galulue ma nonofo i Samoa.
O Vaimea foi sa loka ma faafalepuipui ai nisi o le atunuu sa auai i le Mau a Pule faapea le Mau na mafua ona o le lē fiafia o o tatou ta’ita’i ma tagata i pulega a Niu Sila.
Na tapunia le falepuipui i Vaimea i le tausaga e 1952 ae amata faaaogā le falepuipui i Tafaigata i le 1953 lea ua tapunia foi, ina ua fausia ma faaaogā le falepuipui fou i Tanumalala.
