O le faatalanoaga o loo faagasolo e saili ai agava’a o sui sa tauvā i le palota tele ma sui faipule o le Palemene mo tofiga Ta’ita’ifono o Fono Faavae, ua faitioina e le vaega faaupufai o loo ‘agaia le malo e pei ona faailoa i auala o faasalalauga a le pātī e puipuia aiā tatau o tagata.
O loo agai le faitioga i le faatalanoaina o sui faipule o itumalo e sui o le Komisi o Tagata Faigaluega poo le P.S.C, ona o le silasila a le itu agai ua tuumaualalo ai tofi faipule sa filifilia e tagata palota o itumalo.
O le sā’ilia o agava’a o ta’ita’ifono e pei ona faia ai fa’atalanoaga o se suiga lea ua faatino i le mavae o le faigamalo muamua a le Faatuatua i le Atua Samoa ua tasi, sa tu’usa’o le tofi taitaifono i sui faipule o itumalo faapalota e 51.
Peitai e iai fa’afitauli sa aliali mai i nisi o fono faavae i le va o nisi o sui o komiti ma latou ta’ita’ifono.
O le aso 23 o Tesema o loo fuafua e tatau ona oo atu iai ua mae’a faatalanoaga ma fa’amautū le filifiliga o ta’ita’ifono i le faamoemoe o le malo ia toe a’e uma galuega i le masina fou o Ianuari pe a mae’a malologa o le Kerisimasi ma le Tausaga fou, ua amatalia ai ma galuega a Komiti ma ofisa o Fono Faavae.
O le a tatou tulimata’i filifiliga poo ai itumalo o le a le toe ta’ita’ifono ai se sui faipule ae o le a se’ei ai se sui sa tauva i le palota tele. Ua folafola e le itu agai o le a latou ave i le faamasinoga suiga o le filifiliga o taitaifono o Komiti o Fono Faavae.
