O le atoa ai o le 15 tausaga o le faiga paaga a Leoleo o le Malo o Ausetalia le Australian Federal Police, ma le Matagaluega o Leoleo, Falepuipui ma le Toe Fuataina a lo tatou Malo, ua faailoa ai e lea Malo nisi o galuega mo le puipuiga o le saogalemu i Samoa ua faatupe i lea faiga paaga.

Ua oo atu i le 12 miliona tala le tau tuufaatasi o galuega o le puipuiga sa fesoasoani ai le auaunaga a leoleo o lea Malo i galuega a leoleo i Samoa ma ua toe sainia ai nisi aiaiga fou o lea faiga paaga, e pei ona sa malaga mai le sui komesina o leoleo a Ausetalia ma se tasi o leoleo sinia e faamautu le sainiga o ia aiaiga e ala i se maliega.

Ua faaopoopo ai se isi vaegatupe e tusa ma le 6 tesimale 5 miliona tala Ausetalia e faatino ai isi galuega fesoasoani.

Mo le silafia o se tasi o vaega tāua o lea fesoasoani e ala i le faiga paaga o mea pueata poo CCTV cameras ua faatutū nei i nisi o nofoaga o le taulaga.

O a’oa’oga mo leoleo i Samoa ua mafai foi ona faatino ona o aiaiga o lea faiga paaga.