Ua sainia e Niu Sila faiga faapaaga e galulue ai ma Kalefonia i suiga o le tau.

O nisi nei faaiuga o le malaga a le tamaitai Palemia Jacinda Ardern a o iai i Amerika ma o lea sainiga aao na saini faatasi ai ma le kovana o Kalefonia Gavin Newsom.

O loo saga faamalosia ai le fefaasoaa’i o faamatalaga e tuuitiitia ai le faaleagaina o le siosiomaga mai kasa oona.
Talitonu le ta’ita’i le atunuu o faiga faapaaga faapenei e aogā e lē gata mo le siosiomaga ae o le tamaoaiga, ma o Kalefonia o loo tutusa ma Niu Sila i taumafaiga o loo taumafai ai nei e puipui le siosiomaga mai kasa oona ona o aafiaga mai femalagaa’iga.
Pau le eseesega o Niu Sila o lea faato’ā amata agai e unaia le faatau o taavale e malu ai le siosiomaga, ae o Kalefonia e lē o toe taliaina le toe avatu o ni taavale fou e faaaogā ai le suauu.

Ua faaalia ai e le sui o Kalefonia lona fiafia tele i le faigapaaga ua osia nei ma Niu Sila ma e talitonu o le a saga faamausali ma unaia ai taumafaiga ia oo atu i le 2050 ua lē toe iai se kasa oona e faaleagaina ai le siosiomaga.