O le asō na faia ai toe sauniga o le afioga i le Minisita Lagolago o Faatoaga ma Faigafaiva le susuga Vaele Paiaaua Iona Sekuini lea na maliu faafuasei i le masina na te’a nei.
O le sauniga lotu na faia i le malumalu o le Ekalesia Faapotopotoga Kerisiano Samoa i Vaitele Uta ona molimoli atu ai lea o lona tino maliu i lona aiga. Na auai atu ai le tamaitai Palemia ma lana Kapeneta e fai ma sui o le Mālō ma tuuina aloaia atu ai le tagavai o le Mālō i le faletua o le Alii Minisita Lagolago ma lona aiga.
Na faatautaia toe sauniga o le afioaga ia Vaele i lalo o aiaiga o puipuiga o le faamai Koviti-19 le ua iai nei Samoa i le laasaga 2.
E pei ona silafia e maliu Vaele o loo ia umia le tofi o le Minisita Lagolago o Faatoaga ma Faigafaiva lea o loo Minisita ai le afioga Laauli Leuatea Polataivao Schmidt, sa ave a foi o ia ma Taitaifono o Tupe o le Komiti Faapalemene o le Palemene o Samoa. O ia o le Sui mai le Itumalo o Gagaifomaua Numera 2 i le Palemene o Samoa.
