Faia suesuega i se alii Saina i le faatau atu o figota o le sami i le Atu Asia

Ua faagasolo se suesuega a leoleo faasaga i se alii Saina faipisinisi ua masalomia o loo ia faatau mai nisi o le au faifaiva o le atunuu nisi o figota o le sami i le faamoemoe e faavela ma faalā ia mago ona ave lea e faatau i maketi i Asia aemaise lava le atunuu o Saina.

O le suesuega a leoleo ua afua mai i se sailiiliga na taulamua ai le Minisita o Faatoaga ma Faigafaiva Laauli Leuatea Polataivao Schmidt i le faaiuga o le vaiaso ua mavae.

Na maua i Lea sailiiliga se nofoaga i Vaitele Fou o faavela ai ia figota o le sami ma tapena ai mo le aveina i fafo e faatau ai.

Ua faalia i se ripoti o le tau o fugafuga ma mama’o na maua i lea nofoaga e tusa ma le $7.5 miliona tala e fua lea tau aofai i le tau o loo faatau atu ai i maketi i Asia ia figota o loo ‘oa ai le gataifale o Samoa aemaise isi atunuu o le Pasefika.

O le tausaga e 2007 na faia ai le tapu a le malo i lea vaitau e oo mai lava i le taimi nei e matuai faasā ona fagotaina ia figota i le faamoemoe e faatau ma ave i atunuu e pei o Asia o loo alumia ai.

Share on facebook
Share on twitter
Share on email
Share on whatsapp

Keep uptodate with Radio Samoa activity & promotion

* indicates required