Ua ave nei le faatonuga a le faamasino sinia o le faamasinoga maualuga i le ofisa o le Loia Sili ma leoleo, ina ia faia se suesuega i le mafuaaga o le nofo taofia i le vaaiga a leoleo mo le umi e 4 tausaga, o se tamā o loo molia i ni solitulafono tau feusuaiga ma sē e iai sona piitaga faaleaiga ae e lei suesueina lava ia moliaga.

O le fofogaina o mataupu tau solitulafono poo le criminal mention i le vaiaso nei, na tulai ai lea tamā ma ia faailoa i le faamasinoga, e faapea sa ia fai i leoleo o le falepuipui i ona moliaga ma lona nofo taofia ai, ae sa faailoa iai e leoleo o le toese e taatia atu ia i latou lea tulaga.

Ina ua fesili le faamasino i lē o loo molia, pe sa asiasi atu nisi o lona aiga i le falepuipui ae o le tali e leai.

E manatu le faamasino sinia le afioga Vui Clarence Nelson e pei ona ia saunoa i lē o loo molia, atonu o le tulaga ma’ale’ale o ona moliaga le mafuaaga o le leai o nisi o lona aiga e asia o ia.

O le aso 26 o le masina nei e toe tulai ai lea tamā i le faamasinoga, ma e tatau ona tuuina atu ai se lipoti a leoleo ma le Loia Sili e faailoa ai mafuaaga o le umi o taofia pea lē ua molia e aunoa ma le suesueina o solitulafono o loo molia ai.