O le taumafaiga ia maua auala e kuka ai le limu o loo maua mai le gataifale o le atunuu auā le saunia ai o taumafa ina ia faalauiloa mo le soifua maloloina o loo galulue ai le vaega o faigafaiva i le Matagaluega o Faatoaga ma Faigafaiva ma le ausuesue mai le Iunivesite o Sunshine Coast i Ausetalia.

E lua ituaiga limu o le a faia iai le suesuega o le limu fuafua ma le limu aau.

Ua faaalia o suesuega na maua ai e tele aogā o le limu pe a faaaogāina i kuka mo taumafa o aso uma mo le soifua maloloina o tagata o le isi itu e faigofie ona kukaina.

Ua faaalia foi e le ofisa sili o pulega o le Matagaluega o faatoaga ma faigafaiva ia Dr Seuseu Tauati e talia lenei avanoa tāua o le galulue faatasi ma le Iunivesite lea ma e talia foi le iai o se tusi kuka o le limu ina ia taumafai lava ona faaitiitia le faaaogāina o falaoamata ma ia faaitiita ai foi faama’i e aafia ai o tatou tagata e pei o le leaga o fatuga’o ma le ma’i suka ma isi tulaga lamatia o le soifua maloloina.

Sa faia le taumafataga aoauli mo le Palemia ma le Kapeneta e le matagaluega ma faalauiloa ai nisi o limu ma o se tulaga na ta’ua e le Tamaitai Palemia o se tulaga lelei ua iai le limu e faalauiloa ai le solosolo lelei ma le manuia o le tamaoaiga o Samoa.

O le vaiaso na tea nei na faia ai lea faamoemoe i le maketi o i’a i Apia ma Salelologa auā le tofo a le atunuu ma ia mafai ona fiafia i le tusi kuka mo le limu auā le soifua maloloina.