Ua toe o nai aso ona faatofā atu lea i le 2021 peitai o se faaiuga o le tausaga faanoanoa mo se tasi o aiga i Vaitele Tai i le tōfāfā i le po o le Aso Gafua ma le fiafia ae lilo i manatu o le a fafagu i le valuapō i se faalavelave.
Na faatamaia uma le fale a lea aiga ma liu lefulefu ai ma le taavale ina ua faaumatia ia meatotino taua ma aoga i le malaia poo le afi.
Ua faailoa e nisi o aiga tuaoi na o latou muamua silafia le faalavelave o le tala ane a le aiga o le tulinamu ua masalomia o le mafuaaga lea o le mu.
O le femēmēa’i ma le lē mautonu na lē maua ai le nofoaga na teu ai le ki o le taavale ma tuai ai ona faia se gaioiga e laveai ai mea meatotino ma e taunuu foi taavale fuimu e pei ona taua e molimau ua lē aoga le fale ma le taavale.
E ui o le mau a le aiga o le tulinamu na mafua ai ae o loo faia pea suesuega a le tineimu ma leoleo i lea faalavelave. O le tala fiafia e leai se ola na maumau i lea faalavelave.
