O se tama tane sa nofo taofia i le vaaiga a leoleo e faatali ai le aso o lona faamasinoga, ua lipotia le maliu ina ua auina atu i le falemai, a o nofo taofia ai.

O lea tagata e pei ona faailoa e le komesina o leoleo i se lipoti o se tasi o tagata e toalima na taofia e leoleo i le mae’a o se osofaiga i Faleatiu i le masina o Aokuso lea na maua ai nakoti o ni laau faasāina o le maruana.

E limaafe laau maruana na maua i le osofaiga faatasi ai ma ni laau malosi e lei lesitalaina faaletulafono.

O le a iloa i le taotoga faapitoa pe o se gasegase poo nisi tulaga na mafua ai ona maliu lē sa nofo taofia i le falepuipui i Tanumalala.

I se tasi o tala mai lea matagaluega, ua faailoa e le Komesina o Auapaau Logoitino Filipo i le nusipepa o le Samoa Observer, e lē o pitotasi le silasila a leoleo i le faatinoga o o latou tiute i le suesueina o mataupu e faato’ai atu, ma e leai foi ni aafiaga o le latou galuega i ni piitaga tau polokiki e fasino lea i le faitioina o le matagaluega i le mataupu i le faalavelave tau taavale ua silia nei ma le lua tausaga lea na maliu ai Tuuau, ae oo mai i le taimi nei e leai se isi ua molia ai.

Faaalia e le Komesina i le nusipepa ua tele tala ma manatu faaalia i luga o upega tafailagi ma fesootaiga televavave le social media ua tuuaia ai le lē agavaa o leoleo ma le faatinoga o o latou tiute.

Peitai ua faaalia e Auapaau i lea lipoti o loo faia le galuega a leoleo i le mea silisili e gata ai lo latou silafia ma le tomai.

O ala o le tulafono o loo limataitaiina ai le latou galuega e pei ona faaalia e le Komesina i le nusipepa.