Ua lipotia mai nei le taunuu ai o le komiti faapea le ‘au su’esu’e ma le ‘au popoto i figota o le sami i le faai’uga ua tatau loa ona tapē pe faalalo i’a o tafolā na pa’ulia i le matāfaga.
Ta’ua o ia tafolā na pa’ulia i le po o le Aso Sa aga’i mai i le Aso Gafua o lenei vaiaso, ma ua faaalia, ua faia lea faai’uga ona o le tulaga ua iai tafolā e faapea ua lē o i se tulaga lelei, ua vaivai ma ua lē mafai ona faaopeopea i se auala e toe aga’i ai i le sami; ua lē iloa foi se isi auala e faasaoina ai ola o nei tafolā.
Faamanino e le faatonu o le vaega o faasao, Department of Conservation a le Golden Bay Operations, o Ross Trotter, e 2 tafolā ua pepē tulou, ma ua o latou faamaonia ua lē o i se tulaga lelei i’a o loo iai i le taimi nei, ma ua 5 aso o fai ma pa’ulia pea nei i’a.
Faamauina e ui i so latou taumafai faapea le galulue ai o le oo atu i le 200 o tagata na ofo atu o latou taimi e fesoasoani e pei ona mafai ona faasaoina ai le tele o isi tafolā muamua, ae ua faamaonia le lē mafai ona faasaoina o ia tafolā e 11.
Ma e na o le pau le faamoemoe o le tapē o ia i’a ma le mautinoa e lē o faia ona o le sauāina ma le faia o ni tulaga lē lelei, ae o le mautinoa ua faia ona o le tulaga pagātia o iai ia tafolā.
