Ua faamaonia mai e le The Warehouse o le a motusia auaunaga a lana upega tafailagi faifaatau, TheMarket.com.
O le faaiuga o le masina fou o le a motusia ai loa lenei auaunaga lea ua tusa nei ma le 5 tausaga lona matua.
I luga o le New Zealand Stock Exchange i le faaiuga o le vaiaso faatoa uma atu o loo faailoa ai e le kamupani ona ua lē mafai ona ausia faamoemoega lea ua maitauina le pa’ū o faatauga e 9.2% i totonu o le tolu masina e oo mai i le faaiuga o Aperila, o le mafuaaga lea o le a tapuni ai.
O le TheMarket.com na faalauiloa i le tausaga e 2019 ma o se upega na tauaofai uma ai le tele o oloa o loo sapalai e isi pisinisi o loo i fafo o le li’o a le Warehouse Group, ma o le Noel Leeming le pisinisi o loo matuai mafatia ai i le pa’u o faatauga i totonu o le kuata tausaga lea na faaiuina i le masina faatoa uma atu.
Puna o Faamatalaga: The Warehouse confirms TheMarket.com closure as group sales worsen – NZ Herald
