O le siitia pea o le aofai o talavou solitulafono i setete o Ausetalia ua faatulaga ai se tali atu iai a le faigamalo a Niu Sa Uelese, e ala i nisi o gaioiga e fia faatino mo le sologa lelei o soifua o tagata i aso taitasi.

O le taumafaiga e pei ona faatulaga e le faigamalo o le a agai sa’o lava i tulafono e tatala ai i tua bail laws ma e aofia ai ma ni tulafono e agai sa’o lava i uiga faaalia o le au solitulafono lea ua maitauina i nisi o mea na tutupu talu ai, a mae’a se soligatulafono e mātele ina o latou tuuina i luga o upega tafailagi ata ma videos o soligatulafono ma foliga e mitamita ai.

O tulafono la ua faatulaga ia taofia ai le tuuina o ia ata ma ni faamatalaga e mimita ai i luga o upega tafailagi.

E 26 miliona ua faaagaga mo taumafaiga ina ia taofia ma faaitiitia ai soligatulafono e aofia ai talavou.

E ui e iai nisi faitioga e faatatau i nisi o fuafuaga ua faaata ae e faapea o le a atili toatele ai talavou i le falepuipui peitai e toatele e manatu ua alagatatau ona gaioi le malo ia fai se faiga i faafitauli ia ua faateteleina i totonu o le setete.