I se lipoti lata mai o le taua i Isaraelu, ua teena e le Palemia o Isaraelu, Benjamin Netanyahu valaau mo le taofia o osofaiga i Gaza ma ia faailoa ai o le a faaauau pea fuafuaga a Isaraelu e tafiesea le Hamas.

Ua faailoa mai i le asō ua ulufale fitafita a Isaraelu ma a latou tanetau i le aai tutotonu o Gaza ma o loo agai mai i le itu i Sisifo ma Sasae le fitafita a Isaraelu.

O faamaumauga ua lipotia e le matagaluega o le soifua maloloina a Gaza ua ta’ua ai e 8,306 tagata ua fasiotia i osofaiga a Isarelu e le gata i le ea ae o le laueleele foi.

O le faamatalaga a le Palemia o Isaraelu e lē toe taofia le osofaiga a lona atunuu ma e pei lava foi ona faia e Amerika i le taimi o le pomuina o Pearl Harbour, e lei toe malilie ane e taofia lea osofaiga aemaise i le taimi na mae’a ai le 9/11, e faapea foi la Isaraelu e lē toe taofia ana gaioiga talu ona osofaia i latou e le Hamas i le aso fitu o Oketopa.

Fai mai Netanyahu o le valaau mai ia Isaraelu ia taofia ana osofaiga o le valaau mai lea e surrender pe gauai loa i faiga faatupu faalavelave.

Fai mai Netanyahu fai mai le Tusi Paia e iai le taimi mo le filemu e iai foi le taimi o le taua, o le taimi la lenei o le taua.