Ua faasā e le Faigamalo a le Feterale i Ausetalia nei, faletalavai mai le toe gaosia o nisi oloa tau togafitiga e pei o le Ozempic lea e masani ona faaigoa o fualaau poo vailaau e faapa’ū ai pauna pe faalusi ai le tino.
Fai mai le 9News i lalo o tulafono o iai nei o loo mafai ai e talavai ona gaosia ane isi igoa mo nisi fualaau (brand names) pe afai e faaitiitia le sapalai ma o loo ogatasi pea lea ma le tulafono, peitai la o le asō ua folafola mai e le minisita o le Soifua Maloloina, Mark Butler e amata atu ia Oketopa ona faasā ona toe faatino lea tulaga.
Ua lipotia o lea faaiuga ua faia ina ua lipotia e nisi gasegase aafiaga poo side effects o ia fualaau ma vailaau ma e fai si ogaoga.
E talitonuina e pei ona ta’ua i le lipoti, a itiiti mai pe ā ma le 20 afe tagata o loo faaaogāina fualaau ia e taitutusa ma fualaau sa’o (copycat drugs) ona o le faaitiitia o le sapalai o oloa sa’o poo branded products.
Fai mai le Malo e mo le puipuiga o tagata.
Puna o Faamatalaga: https://www.9news.com.au/national/copies-of-weight-loss-drug-ozempic-banned-in-australia/ece12ba7-78b3-42cb-a579-762c227b6231
