O le faavaeina ai o se komiti mo lenei vaega ina ia mafai ona folasia nisi o popolega o gasegase o le mafaufau ma ona faafitauli i le atunuu.
O le Komiti o le a tuuina se taiala ma fautuaina le Matagaluega o le Soifua Maloloina e tusa o faiga faavae ma fesaosaoni e mautinoa ai le tutusa ona faatino o auaunaga i ē malolosi ma i latou o loo iai faaletonu o le mafaufau.
O lenei komiti o loo aofia ai nisi o loo iai le tomai faapitoa i le mafaufau, o paaga ma nisi o loo iai le silafia i lenei vaega e galulue faatasi ma le Matagaluega ma ana paaga ina ia atina’e le soifua maloloina o i latou o loo iai tulaga faaletonu o le mafaufau.
E pei ona faailoa i se pepa o faamatalaga a le Pule Sili o le Matagaluega o Soifua Maloloina, Aiono Dr. Alec Ekeroma ua tatau i le taimi lenei ona faia ai se fuafuaga.
“O se tasi lenei o vaega tāua i le soifua o le tagata ma e ao ona faia iai se fuafuaga ua tatau ona faatino se galuega e faatulaga ai vaega uma e moomia ma ia mautinoa ia mafai ona access uma tagata i le gafataulimaina o auaunaga mo i latou e iai faaletonu o le mafaufau.”
Ua mae’a faataatitia vaega e agai ai le auaunaga a le komiti e aofia ai le tuuina atu o fautuaga i le Matagaluega o vaega manaomia e faaleleia ai le auauanga, ao ma tapena faamaumauga ma faamatalaga o le tulaga o loo iai lenei faama’i i le atunuu, atina’e polokalame e agai lea i le puipuiga ma le saogalemu o i latou o loo aafia ma le tele o nisi o vaega.
O sui auai o lenei komiti e aofia ai sui mai le Matagaluega o Soifua Maloloina, Matagaluega o Leoleo, Matagaluega o Tina ma Tamaitai Atina’e o Afioaga ma Aga Fesootai, Ofisa o le Loia Sili, Goshen Trust, Faatāua le Ola ma le Youth Council.
