Ua faavae aloaia i le Matagaluega o le Soifua Maloloina se komiti ua faapitoa mo le soifua maloloina o le mafaufau.

O lea komiti o le a gafa lea ma le tuuina atu o taiala, ma fautuaga i le Matagaluega e faatatau i faiga faavae ma le faia o gaioiga ina ia mautinoa e tutusa le faamuamua o loo tuuina atu i gasegase o le mafaufau faapei o gasegase o le tino.

Ua faia lea tulaga ona ua vaaia le faatupulaia o lea foi gasegase i le atunuu.

Ua faailoa e le Ofisa Sili o Pulega o le Soifua Maloloina, Susuga Aiono Dr Alec Ekeroma o se tulaga ua tatau ona faatino ina ia mautinoa e maua e tagata o le atunuu lea auaunaga i lona tulaga lelei faalesoifua maloloina.

O le komiti ua filifilia e aofia ai nisi ua iai le tomai faapitoa i tulaga tau soifua maloloina tau le mafaufau, o polofesa i le foia o lea foi ituaiga gasegase faapea ai vaega ma’oti.

O i latou ia o le a galulue soosoo tau’au ma le Matagaluega ma isi vaega tuma’oti ina ia faia suiga ma faatupu tulaga lelei i le soifua maloloina o le mafaufau, e le gata i lea ae latou te iloa vaega o loo opū ai le auaunaga ma faatupu polokalame aogā ina ia taumafai e iloa ma foia le faatupulaia o lea foi gasegase i le atunuu.

I le lalolagi ua maitauina le tasi mai le fā tagata i le lalolai o le a aafia mai lea gasegase i se taimi o lo latou olaga, o faamaumauga ia a le Faalapotopotoga o le Soifua Maloloina o le lalolagi o se tulaga o loo faapopoleina ai le soifua maloloina lautele o atunuu ma e manaomia tele ai ni gaioiga faavavevave e foia ai lea faafitauli.

Ua faailoa o le isi itu o loo fesoasoani atili i lenei faafitauli o le tulaga mativa, o le faiga lē tutusa i le va o tagata atoa ai ma le lē maua o auaunaga lelei e tatau ona faaaogāina e tagata uma.

O le a feagai foi lea komiti ma le faamaumauina o itu o loo fai ma avega mamafa i ia gasegase i le atunuu. 

O le atina’e, faagaioina ma le fua tatau lelei o polokalame e auga tonu i le taumafai e puipuia, togafitia ma toe fuataina tagata taitoatasi o loo soifua ma lenei gasegase.

E le gata i lea ae o le unai o le galulue faatasi o le Matagaluega ma isi itutino o le malo faapea faalapotopotoga tuma’oti e faalelei auaunaga tau soifua maloloina.atoa ai ma le faamalosia o suesuega e mafai ona faatino aua le faatupu o metotia fou e avea ma faavae o auala e mafai ai ona tali atu i faafitauli e maufua ai le gasegase o le mafaufau.

O sui o lenei komiti o loo aofia ai Matagaluega e pei o le Soifua Maloloina, Leoleo, Tina ma Tamaitai, Ofisa o le Loia Sili, Goshen Trust, Faatāua le Ola ma le laulauafono mo tupulaga talavou.