E lua ni fale o ni aiga na faaumatia i le malaia poo le afi i lenei vaiaso ma ua tele meatotino aogā a ia aiga i Faleula ma Maagiagi ua faatamaia ai.
O le po o le Aso Lua na aafia ai le fale i Magiagi ma e tupu le faalavelave e pei ona faaalia ise lipoti a le nusipepa o le Samoa Observer, e toatolu ni fanauiti sa na o latou sa iai i le fale.
Peitai e lei aafia se tasi o i latou, ae o mea aogā uma sa iai i totonu o le fale na afaina uma i le afi.
Na sosoo le mu lea ma le afi na faatama’ia ai le fale o se aiga i Faleula i le po o le Aso Lulu ma o loo faia iai suesuega a leoleo, ona o loo iai masalosaloga o se gaioiga solitulafono na faatupu ese tagata na mafua ai le mu.
E lē gata i le fale o lea aiga na faaleagaina i le mu, ae o nisi o meatotino taugata e pei o taavale na aafia ai.
O le a tuliloa leoleo mo se faamatalaga faatatau i ia faalavelave tau mu i le mafuaaga.
I se tasi o faalavelave, ua molia e leoleo i le ave taavale faatamala ua mafua ai le maliu o se tamatiiti 17 tausaga le matua, se alii 28 tausaga le matua o le avetaavale na lavea ai lē ua maliu.
O le faalavelave na tupu i le nuu o Lano i le Aso Faraile na tea nei.
Faaalia e leoleo ua molia foi le avetaavale i le tago i le foeuli ae leai se laisene avetaavale.
O le isi lua vaiaso o le a tulai ai i le faamasinoga le ua molia, ae o loo tatala i tua i aiaiga masani o le taofia o le tusifolau ma saini i le ofisa o leoleo i Tuasivi.
