O Aukuso o le tausaga ua mavae na faamalolo le tumau ai le sa avea ma Loia Sili a le Malo le afioga Savalenoa Mareva Betham Annandale, ae o Setema o le tausaga lava na tea nei na faamuta ai lona toe avea ma Loia Sili.

O lea faaiuga e tauala mai ile Palemia o le Minisita foi o le ofisa o le Loia Sili a le Malo ua faaulu ai se talosaga poo se su a Savalenoa faasaga ile Palemia le afioga Fiame Naomi Mataafa ua tuua’ia ai le solitulafono o le faaiuga e faamuta lona tofiga o le Loia Sili a le Malo.

A’o lei faia lea faaiuga e pei ona silafia e le atunuu, e sefulu aso na tuuina atu e le Palemia ile Loia Sili i lea taimi e tali atu ai i ni mataupu faasino i ni gaioiga sa fesiligia ai le tutoatasi o lea tofiga ina ua alia’e mai tulaga le mautonu i upufai o le Malo ina ua mae’a le palota tele ia Aperila o le tausaga na tea nei.

O se tasi o ia gaioiga o se pepa o faamatalaga faalauaitele mai le Loia Sili i lena taimi na tuua’ia ai le faaitu’au ma le pitotasi o le faamasinoga, ina ua aumai se faaiuga na agai ile faatautoga na faia ile faleie.

O lea iuga na toe fesiligia e le Loia Sili i se talosaga apili na faamautu atili i se faaiuga a lena faamasinoga le aloaia faaletulafono o le faatautoga o faipule o le Faatuatua i le Atua Samoa ua Tasi.

O le Aso Faraile ua mavae na faaulu ai ile faamasinoga le su a le afioga Savalenoa Mareva Betham Annandale ma e le o iloa se aso e fofogaina ai mo le valaauga muamua.