Faatumulia le koneseti a le alii pese lauiloa Sir Elton John anapo i Kalaiesetete.

E lei atoa se fa itula na taunuu ai le vaalele a le alii pese i Kalaiesetete ananafi i le uma ai o ana faafiafiaga i Ausetalia, ae amata le uluai po o pesepesega a o iai i Niu Sila mo le taimi mulimuli.

O lana malaga taamilo lenei ua faaigoaina o le Farewell Yellow Brick Road tour, ma o le koneseti anapo o le uluai taimi lea ua pese ai i Kalaiesetete talu mai le 1990.

E ui e na o le pau lea o le koneseti a Elton John i le South Island a o iai i Niu Sila, ae o se fiafiaga i le toatele e pei ona molimau ai le sui o le vaega o turisi aemaise le toatele ua toe molimau i luga o le Facebook.

O faamaoniga na maua e tala fou i luga o le upega tafailagi o loo faatau ai tickets, o lea na taulia uma pepa ulufale ma e tusa ma le 28,000 le aumaimoa.

O tupe e maua mai nei pepa ulufale e tusa lea ma le $4.4 miliona.

Toe lua faafiafiaga a le alii pese i Niu Sila ma e faia uma lea i Aukilani i le Aso Faraile ma le Aso Toonai nei.