O le Aso Gafua sa faatino ai se feiloaiga a le Matagaluega o Leoleo, Falepuipui ma le Toefuataiga ma le Pulega a Alii ma Faipule o Afega.

O le sāvali a le Matagaluega i le afioaga o Afega o le auga lava e tasi o le tausia o le filemu ma le afioaga o Leauvaa, aemaise le faatumauina o le malupuipuia o tagatanuu o afioaga e lua.

I se faasalalauga faalauaitele a le matagaluega i auala o fesootaiga televavave ua faailoa ai, o le afioga i le Taitai Leoleo Sinia (Superintendent) ia Tuaena Lomano Paulo o le vaega o Galuega Soosootauau ma le Atunuu (Community Engagement Unit) ma nisi o Taitai Leoleo Asiasi sa fai ma sui o le Matagaluega i lea feiloaiga tāua. 

O le afioga i le Faipule le tofa Maulolo Tavita Amosa sa fai ma sui o le afioaga o Afega, ma na ia faafetaia le Matagaluega e tusa ai ma le sāvali.

Sa faaalia ai e le afioga i le alii faipule le talia ai e le afioaga o Afega o le sāvali mo le tausiaina pea o le filemu.

Naunautaiga lava, ina ia saogalemu ma malupuipuia tagata uma.

Ua momoli ai le faafetai a le Matagaluega o Leoleo, Falepuipui ma le Toefuataiga i le Pulega a Alii ma Faipule o Afega mo lo latou lagolago i le galuega faatino a le Matagaluega auā le tausia o le nofo filemu i totonu o nuu ma afioaga aemaise o totonu o si o tatou atunuu o Samoa o loo faavae i le Atua.